موضوعات سابقة
ارسل الموضوع لصديق
يا حيـــ.. لأ عزيزتي رحاب..
أرجوك اصبري على قراية جوابي للآخر، اعتبريه آخر طلب لي.
عارف إنك مش طايقة مني ولا كلمة، والكلمة دي بالذات لا يمكن تكوني عايزة تسمعيها، وكمان ما ليش الحق دلوقتي أقولها لك لأنك بقيتي لــ"حد تاني". وكمان لأنها هتفكرك بأجمل أيامنا لما كنا بنسمع أحلى أغنية لأم كلثوم؛ وخصوصاً "مقطعنا" زي ما كنا مسميينه "يا حياة قلبي.. يا أغلى من حياتي".
عارف إنك بتوصفيني بالخيانة، وفي آخر لقاء لينا وصفتيني حرفياً بـــ"الندل". وطلبت مني تبريراً للتخلي عنك والتضحية "بكِ" على حد تعبيرك.
ولما بصيت للأرض وحنيت راسي علشان ما تشوفيش دموعي وما تشوفيش اللي عاوز أخبيه عنك -أعمل إيه ما إنت الوحيدة اللي بتقريني زي الكتاب المفتوح- صرختِ في وشي "جبان.... جبان" وسبتيني ومشيتِ وبعدها بأسبوع قبلت العريس اللي كان متقدم لك.
كنت عاوزة أقول لك إيه وإنت جايه تقولي لي إنك خلاص مهّدت لوالدك موضوعنا، وإنه رحّب بي لما قلتي له إني عاوز آجي أتقدم لك، وحكيتِ له عن اللي بيننا. ما قدرتش أقولك غير الكلام اللي قعدت أحفظه من امبارح.. الكلام اللي يوضح لك أد إيه أنا ندل وجبان....إلخ..
رميته لك وكنت عارف تأثيره عليك.. قلت لك كلام قبل ما "يجرحك" "قتلني".. قلت لك بالحرف: "ياه إنت صدقت، ده كان مجرد وقت لطيف بنقضيه.. ليه تكبري الحكاية وتقولي لبابا"؟
كنت عاوزاني أقول لك إيه؟ أقول لك إني كان لازم أعمل كده، وإني ضحيت ليكِ مش بيكِ، أقول لك إيه؟ أشرح لك على طريقة الأفلام العربي اللي بتحبيها واللي باستسخفها إن إزاي الألم اللي كنت بأعاني منه في جنبي ما طلعش الزايدة، وإنه طلع "سرطان"، أيوه... "سرطان"، أقول لك كمان إن الدكتور كان صريح معايا وقال لي إنه في آخر مراحله، وإني في أواخر أيامي فعلياً وإني بطل علشان مستحمل الألم ده، وإني... وإني... بقية الكلام ما سمعتوش لأني ما كانش عندي وقت.. كنت بافكر أقول لك إيه..
في الأول قررت أقول لك الحقيقة؛ لكن قدام معرفتي بيك قررت أحب "الأفلام العربي"، واستخدمتها معاك وجابت نتيجة كويسة... كرهتيني... ومشيت في طريقك زي ما كنت عاوز... صدقيني ما كنتش ناوي أقول لك على الحقيقة، لولا إني حسيت إني مش هاقدر أسيب الدنيا وإنت لسه زعلانة مني، روحي مش هتقدر تحلّق في "رحاب" السما قبل ما تصفحي عني.........
أشوف وشك على خير يا "رحاب".
الخميس 13 أغسطس 2009 - 22:36