ددى شوية نكت لابو العربى وبنمسى بيها ع كل البورسعدية وخصوصا صاصا
مرة ابو العربي ركب مركبه فقامت عليه موجه راح مطلع المطوه قال له بلآش انت يا بحر
ابو العربى سمع ان صاحبه الياباني عيان فسافر ?ه.وهو معاه في الإنعاش قله الياباني يوكوهاما قام رادد متخفش بنتك في عيني فقله يوكوهاما قله مقلتلك بنتك في عيني ومات الراجل .وابو العربي قاعد بيعزى فيه قال فين يوكوهاما أبوها موصينى عليها فقله واحد من القاعدين هو قلك يوكوهاما فقله آه قله دى معناها قوم من على أنبوبة الأكسجين
ابو العربي قاعد بيتباهى على القهوة وحسن المراكبي مش راضى يعدى الكلام .
ابو العربي يقول :أنا مره ماشى في الصحراء لقيت بت حلوة واقفة في البلكونة ....
حسن المراكبي يقول : حرام عليك هو في بلكونات في الصحرا.
ابو العربي : بلاش ده , أنا مره ماشى في الصحرا لقيت تلاجة ومليانه أكل
حسن المراكبي : يا ابو العربي والتلاجة حتشتغل ازاى في الصحرا.
ابو العربي : بلاش ده أنا مره ماشى في الصحرا لقيت أسد ضخم كبير جدا...
حسن المراكبي : ها وبعدين
ابو العربي : قام أكلني عشان ترتاح يا حسن
العربي قابل واحد صاحبه متغاظ من أمريكا فقال له شوف أمريكا من غضب ربنا عليها خلاها هناك في آخر الدنيا لكن مصر يادوب ساعتين بالييجو
ابو العربي كل يوم يطلع من الجمرك بالموتوسيكل وشايل صندوق صغير وراه .. مفتش الجمرك يقوله فيه ايه في الصندوق يقوله مافيش ويديله ساعة يد ويقوله عديني يروح معديه .. ومره المفتش قال له افتح الصندوق يابو العربي قاله مفيش داعي قاله افتح الصندوق ففتح ابو العربي الصندوق لاقاه فاضي قاله ادفع نص عمري يابو العربي واعرف انت بتهرب ايه .. ولو قلت لي الصراحة حاخليك تعدي لوش شايل جمل .. قاله احلف وانا اقولك .. حلف المفتش .. ابو العربي قاله أنا باهرب موتسيكلات.
ابو العربي في حرب أكتوبر راكب فلوكه في القنال وبيحكى ويقول لقيت فوقى واد طيار إسرائيلي أول ما شفنى حدف عليا صاروخ قمت زقيته ..راح حادف واحد تانى وطيت راسى راح جاى في الفلوكه وقعت في المية واتشعلقت في خشبة وقعت اجدف بيدى.. حدف عليا صاروخ تانى قمت غاطس في القنال.. برده لقيته نازل بالطيارة عليا وقرب منى خالص وحدفلى قروصه مارلبورو وقال لي جدع يآله .
أبو العربي كان قاعد على القهوة وجالوه المخبر وقال له تعالى كلم ضابط المباحث فراح معه فدخل على الضابط وقال له صباح الفل يا باشا أنا ابو العربي فقال له الضابط انت ابو العربي أخو البت سماسم الرقاصة اللي ساكنة في
الشارع اللى ورا فقال له ابو العربي لا يا باشا أنا ماعنديش اخوات بنات فقال له الضابط طيب اطلع للمأمور فطلع للمأمور وقال له صباح الفل يا باشا أنا ابو العربي فقال له المأمور انت أخو البت سماسم الرقاصة اللى ساكنة في الشارع اللى ورا فقال له لا يا باشا أنا ماعنديش اخوات بنات فقال له المأمور طيب اطلع لمدير الأمن فدخل ابو العربي لمدير الأمن وقال له صباح الفل يا باشا أنا ابو العربي فقال له مدير الأمن انت أخو الواد سيد اللى كان عاوز يغتال شخصية مهمة هنا الأسبوع اللى فات فقال له ابو العربي لا يا باشا والله العظيم أنا أخو البت سماسم الرقاصة اللى ساكنة في الشارع اللى ورا .
الأحد 17 فبراير 2008 - 14:40
